2024ko martxoak 1

Martxoak 8, Emakumeen Nazioarteko Eguna. ISILARAZI MATXISMOA.

Foto noticia

ISILARAZI MATXISMOA

  • Programazioa:

HITZALDI ZIKLOA

Manosfera. Zer da? Matxismo antolatua! Eta zer egin dezakegu?

Diskurtso matxistek indarra hartzen dute interneten, eta horiek «manosfera» deitzen dugunaren parte dira. Gune birtual horietan mezu antifeministak, misoginoak eta genero-indarkeriaren ukatzaileak zabaltzen dira, eta egungo jendartean gizona benetako  biktima gisa aurkezten dute, fake news eta inolako oinarririk gabeko informazioz inguratuta. Zer gin dezakegu honen aitzinean?

📆 Martxoak 7, ortzeguna ⏰ 18:00
📍 Arizkuneneako hitzaldi aretoan (azken solairuan)

Hizlaria: Esti Linares, gizarte langilea, ikertzaile eta ekintzaile feminista

Informazio gehiago berdintasuna@baztan.eus helbidean edo 613 003634 telefonoan.

Manosfera esploratzen: maskulinitatearen tentazioak eta krisia

Hitzaldi honetan, Manosfera aztertuko dugu ikuspegi kritiko batetik, gizonak online espazio horretara erakartzen gaituzten zergatiak eta aurrez aurre dauzkagun nortasun krisiak jorratuz. Alfa kulturaren eragina, genero rolen bilakaera eta misoginia eta “toxikotasuna” bezalako alderdi problematikoak aztertuko ditugu. Helburua da maskulinitate garaikideari buruz hausnartzea eta haren adierazpen osasungarriago eta orekatuago baterako bideak bilatzea. Maskulinitateetatik eta gizon bezela nola aurre egin ere aztertuko dugu, izan ere Manosferako ideia eta argudio asko gure inguruetako errealitatera salto egin dute jada.

📆 Martxoak 14, ortzeguna ⏰ 18:00
📍 Igantziko Baratzondo egoitzan

Hizlaria: Asier Arizkorreta, musikologoa, pedagogoa eta maskulinitateen inguruko formatzailea

Informazio gehiago berdintasuna@bortziriakberd.eus helbidean edo 722 693078 telefonoan.

ANIMATU ZAITEZ!! 

ELKARRETARATZEAK ETA MOBILIZAZIOAK

ADIERAZPEN INSTITUZIONALA

ISILARAZI MATXISMOA

Martxoaren 8an, Emakumeen Nazioarteko Egunean, agerian utzi nahi dugu berdintasun politika publikoek eta feminismoak duten balioa, gizarte-mugimendu eta mugimendu teoriko eta politiko gisa, emakumeek eta gizonek eskubide berak dituzten berdintasunezko gizarte libre baterantz aurrera egiteko. Erdietsitakoa gora behera, benetako berdintasunerantz aurrera egiten jarraitu behar dugula aldarrikatzen jarraitzen dugu.

Feminismoak ibilbide luzea egin du mugimendu sozial eta politiko gisa, eta historian zehar genero-desberdinkerien aurrean emakumeek duten ezinegona adierazteko modu baketsuak izan ditu ezaugarri beti. Feminismoa ezagutza zientifikoa ere bada, sistema patriarkalari eusten dioten elementuak teorizatu eta kontzeptualizatzeko azterketa eta analisi ibilbide luze batekin. Baina mugimendu feministaren lorpen bakoitzak beti izan du erreakzio matxista bat, kontrako erantzun bat, ezarritako ordena sozialari eustea defendatzeko eta gizonen eta emakumeen arteko desberdintasun-harremanak ezabatuko dituen benetako eraldaketa soziala saihesteko. Erreakzio hori bereziki nabarmena izan da azken urteotan, batez ere aldarrikapen feministak agenda politikoan sartu direnetik.

Informazioaren teknologiek eta ingurune digitalek, oro har, beste esparru batzuk sortzea erraztu dute, eta esparru horietan, hain zuen, erreferente eta/edo programa feministen eta berdintasun arloko edozein aurrerapen edo lorpenen aurkako eraso antolatuak eta deskalifikazioak sustatzen dira. Feminismoaren eta emakumeen aurkako gorroto-diskurtsoa Interneten espazioak hartzen ari da, eta manosfera izenarekin ezagutzen dugunaren inguruan biltzen da. Inguru horretan antolatzen da matxismoa eta bertatik hedatzen dira mezu anti-feminista eta misoginoak. Gure testuinguruan, Manosferako talde edo azpikultura bereizgarrienak dira gizonen eskubideen aldeko elkarte edo taldeak, sedukzioaren guruak, influencer eta eduki-sortzaile antifeministak, foroak, incelak

Matxismo digitala batez ere gazteengan eragina duen komunikazio- eta harreman-modu berri bat da. Ideiak eta interpretazioak azkar eta berehala hedatzen dira, eta mezuak etengabe sortzen dira, zehaztasunik eta inolako analisi edo eztabaida kritikorik gabe, horiek indartzen dituzten daturik edo ebidentziarik gabe. Maskulinitate tradizionalaren eredua betikotzea xede duten gezurren eta fake news delakoen garaian bizi gara. Maskulinitate horretan gizonek eta emakumeek ezarritako genero-rolak betetzen jarraitzea sustatzen da. Desberdinkeriak zalantzan jartzen dituzten eta, are gehiago, emakumeek gizonak menderatu nahi dituztela iradokitzen duten mezuak; sexu-indarkeria hutsaldu edo are emakumeen aurkako indarkeria existitzen dela ukatzen dutenak; emakumeen askatasuna behin eta berriz zalantzan jartzen dutenak… Internet hartzeaz gain, mezu horiek instituzio publikoetan oihartzuna dute, eta aurrerapen berrien lorpena zailtzen dute, dagoeneko adostasun soziala zuten eztabaidak berriz ere zalantzan jarriz.

Berdintasuna deserosoa da bizi dugun gizartea birpentsatzera eta modu kritikoan aztertzera behartzen gaituelako. Ikasitakoa etengabe zalantzan jartzen du pertsonek askatasunez eta baldintzatzailerik gabe erabaki dezaketen eredu berriak eraikitzeko. Feminismoa, historian zehar emakumeen ahalduntzea bultzatu duena eta gizarte aldaketa handiak lortu dituena, oso kritikoa da ere maskulinitate hegemonikoarekin (tradizionala), eta hainbat hamarkada daramatza gizonak interpelatzen. Zuzeneko interpelazio horrek beldurra eta aldaketarekiko erresistentziak eragiten ditu gelditasunean erosoago dauden gizarteko sektore batzuetan. Manosferak bere burua zalantzan jartzeko eta aldatzeko beharrik ez duten espazio bat eskaintzen die, arrakalatutako maskulinitatea leheneratzeko aukera ematen diena.

Internet eztabaida publikoa polarizatu eta inpunitatea errazten duen etsaitasunezko toki bihurtzen duen diskurtso horren aurrean, beharrezkoa da emakumeek lortutako eskubideak finkatzea bermatzen duten berdintasun politikak sustatzen jarraitzea, eztabaida publikoa errespetutik egitea sustatzea, agenda politikoan desberdinkeriak agerian utziz, aurrera egiten jarraitzeko.

Adierazpen hau bultzatzen dugun Toki Entitateek honako konpromiso hauek hartu ditugu:

  • Emakumeen eta gizonen arteko berdintasuna sustatzen jarraitzea gure esku-hartze eremuan politika publikoen bitartez eta udal-arau, -plan eta -proiektu guztietan genero-ikuspegia txertatuta.
  • Azterketa eta ikerketa feminista bultzatzen jarraitzea gure testuinguruan, pertsonen bizitzako esparru eta etapa guztietan dauden desberdinkeriak ikusarazteko.
  • Mugimendu feministaren ekarpenak eta lana aitortzea, bidezko eta berdintasunezko gizartea lortzeko, erakundeekin hitz egiteko guneak sortuz.
  • Adin guztietako gizonekin esku-hartzea bultzatzea, berdintasunezko maskulinitate-ereduen eraikuntza sustatzeko.

NOTICIAS RELACIONADAS

Imagen BAZTANGO UDALA, MUGIMENDU FEMINISTAREKIN LANKIDETZAN, LANEAN ARI DA 2024KO BESTAK EMAKUMEENDAKO SEGURUAK IZAN DAITEZEN

BAZTANGO UDALA, MUGIMENDU FEMINISTAREKIN LANKIDETZAN, LANEAN ARI DA 2024KO BESTAK EMAKUMEENDAKO SEGURUAK IZAN DAITEZEN

Ahalegin bateratu batean, Baztango Udaleko Gizarte Zerbitzuek eta Berdintasun Zerbitzuak, tokiko mugimendu feministarekin elkarlanean, ekimen bat iragarri dute herritarrak eta funtsezko eragileak prestatzeko, 2024an besta-inguruneetako indarkeria matxistei eta sexualei aurre egiteko eta artatzea eta prebentzioan aurrera pausuak egiteko asmoarekin. Ekimen hau nagusiki hiru taldetan zentratzen da: herri bakoitzeko besta-komisioak eta Baztandarren Biltzarreko kideak, ostalaritzako negozioak eta eta Brigada Moreak antolatzeko edo horietan parte hartzeko interesa duten herritarrak oro har.

Volver arriba