Baztango Udalak, Berdintasun eta Oinarrizko Gizarte Zerbitzen eskutik, “AMArtean” jarduera zikloa aurkezten du. Proposamen honek amatasunaren esperientzien inguruko topaketa, gogoeta eta sentsibilizaziorako gune bat sortzea du helburu. Herritar guziei zabalik dauden hitzaldi eta jarduera kulturalez osatutako ziklo bat da, ikuspegi literariotik abiatua eta gorputza eta bizipenetan oinarrituta, loturak ehuntzeko eta amatasun garaikidearen inguruan gogoeta kritikoa pizteko.
Sei jarduera izanen dira udaberri eta udazkenean zehar, eta horietan parte hartuko dute idazle, argazkilari, antzerkilari eta aditu ezberdinek. Bertan jorratuko dira, bertzeak bertze, indarkeria obstetrikoa, kontziliazioa, zaintza edo amatasun esperientzia anitzak. Horrez gain, urrian ama-talde egonkor bat sortzeko interesa duten emakumeekin bilkura irekia eginen da.
Udaberria: amatasuna birpentsatzeko gonbitea
Zikloa udaberrian abiatuko da sentsibilizaziorako hiru jarduerarekin:
- “Amatasunaren inguruko errepasoa” | Hitzaldia Estitxu Fernandez-ekin
Maiatzaren 13an (asteartea) | 17:00-19:00 | Arizkuneneako hitzaldi-gelan
Egileak amatasunari buruzko bere hiru lan garrantzitsuak aurkeztuko ditu: Gure erditzearen jabe (2013), M ama, eme, ume (2022) eta Sortze berri bat (2023), gorputza, haurdunaldia eta loturak ardatz hartuta.
- “Lotura Basatiak” | Antzerki-performancea
Maiatzaren 25ean (igandea) | 18:00etan | Iruritako antzokian
Amatasunak ehuntzen dituen lotura basati eta ikusezinen inguruko proposamen eszenikoa.
- “Ama ta Asunak” | Argazki erakusketa eta proiekzioa June Baonza Pagaldai-rekin
Ekainaren 12an (ortzeguna) | 17:30-20:30 | Arizkuneneako 3. solairuan
Ama-alaba harremanak, memoria eta nortasuna ukitzen dituen lan bisual intimoa eta poetikoa.
Udazkena: amatasun eta zaintzaren inguruko formakuntza
Udaren ondotik, zikloak jarraipena izango du formazio izaerako hiru hitzaldirekin:
- “Kontziliazioaren eta amatasunaren ipuina” | Berhezi-rekin
Irailaren 17an | 18:00etan | Arizkuneneako hitzaldi-gelan
Amek pairatzen dituzten presio sozial eta lanekoen inguruko ikuspegi kritikoa.
- “Indarkeria obstetrikoa” | Estitxu Fernandez Maritxalar-ekin
Irailaren 23an | 17:00ean | Arizkuneneako hitzaldi-gelan
Haurdunaldi eta erditze prozesuetan ematen den isilpeko errealitatearen inguruko gogoeta.
- “Nola zaindu norbera eta elkar amatasun garaian?” | PAREAN elkartearekin
Urriaren 8an | 18:00etan | Arizkuneneako hitzaldi-gelan
Banakako eta taldeko zaintza-praktikak amatasun esperientzian.
Ama-talde baten sorrera lantzeko bilera irekia
Zikloari bukaera emateko, amatasunen inguruan lan egiteko interesa duten emakumeekin bilera ireki bat antolatuko dugu. Bilera horretan elkarrekin aztertuko ditugu taldearen interesak, helburuak, dinamika eta partaideen erabilgarritasuna.
Urriaren 21ean | 17:00ean | Arizkuneneako hitzaldi-gelan
Baztango Udaletik herritar guztiak gonbidatu nahi ditugu jarduera ziklo honetan parte hartzera. “AMArtean” proiektuak espazio bat izan nahi du, non amatasunaren inguruko bizipen eta ahots guztiek lekua izanen duten: amatasunean direnak, ez daudenak, zalantzan daudenak, bakarrik sentitzen direnak edo komunitatea bilatzen dutenak.
Antolatzailea: Baztango Udala – Gizarte eta Berdintasun Zerbitzuak
