Datorren maiatzaren 13an, 17:00etan hasita, Arizkuneneako hitzaldi aretoan, hitzaldi irekia izanen da Estitxu Fernandez idazle lesakarrarekin. Jarduera hau AMArtean zikloaren barruan kokatzen da. Oinarrizko Gizarte Zerbitzuen eta Baztango Udalaren Berdintasun Zerbitzuaren ekimena da, amatasunen inguruko hausnarketarako eta topaketarako guneak sortzeko, begirada kritiko eta komunitario batetik abiatuta.
Saio honetan, egileak ama izatearen esperientziari buruzko hiru lan errepasatuko ditu: Gure erditzearen jabe (2013), M ama, eme, ume (2022) eta Sortze berri bat (2023). Bere ibilbide literarioaren bidez, Fernandezek erditzeari, hazkuntzari eta loturei heltzen die begirada feminista eta kokaleku batetik, inposatutako estereotipo eta isiluneetatik harago amatasuna pentsatzeko gakoak emanez.
Kontakizun horiek ezagutzea eta horiei buruz hausnartzea funtsezkoa da amatasuna esperientzia homogeneo eta unibertsal gisa desmitifikatzeko. Emozio kontraesankorrei, aldaketek eta itxaropenek zeharkatzen dituzten gorputzei ahotsa emateko aukera ematen digu, baita zalantzak, beldurrak eta ziurtasunak partekatzeko espazio seguruak irekitzeko ere. Literatura, adierazpen-bide gisa, tresna indartsua izan daiteke bizipen indibidualak jakintza kolektibo bihurtzeko.
Herritar guztiak hitzaldi honetara hurbiltzera animatzen ditugu. Amatasuna birpentsatzea ez da soilik amen zeregina: erantzukizun partekatua da, gizarte bidezkoagoa eraiki nahi badugu. Estitxu Fernandezekin izanen dugun hitzordua entzuteko, zalantzan jartzeko eta ikasteko aukera paregabea izanen da.
Izen-ematea ez da beharrezkoa.
