Baztango Udalak, Berdintasun zerbitzuaren bidez, “Oinarrizko Brikolaje lantegia” martxan jarriko duela jakinarazten du, udalerriko emakume* guztiei zuzendutako ekimena. Tailer praktiko honek etxeko mantentze-lan arruntetan ohiko tresnak erabiltzeko autonomia, konfiantza eta esperientzia sustatzea du helburu, hau da, matxuratutako etxeko ohiko tresnetan konponketa txikiak egiteko beharrezkoak diren oinarrizko ezagutzak eta behar diren erremintak erabiltzen ikasiko dute.
Ikastaroak bost saio izanen ditu, bakoitza 2 ordu eta erdikoa, eta Elizondoko Lanbide Eskolan emanen dira. Saioak otsailaren 19an hasiko dira eta martxoaren 26an amaituko dira, asteazken guztietan 17:45etik 20:00etara.
Tailerrean zehar, parte-hartzaileek destornilladoreak erabiltzen, iltzeak sartzen eta ateratzen, karrakarekin eta karrakarik gabe torlojuak sartzen, perkutorearen erabilera ezagutzen, zerra eta egurra eta burdina mozten, kableak zuritzen, lixatzen, segatzailea eta baita entxufe eta etengailuetan oinarrizko konponketak egiten ere ikasiko dute. Gainera, luzagailuak eraikitzea eta etxean gertatzen diren itzalaldiak konpontzea bezalako lanak ere landuko dira.
Ekimen honek jakinmina eta autokontzientzia sustatzeko diseinatuta dago, jendarte tradizionaleko rolak oraindik ere emakumeen garapen pertsonal eta profesionala mugatzen duen gizarte batean ahizpatasuna bulkatuz. Tailer honen bidez, Baztango Udalak emakumeek beren etxeen oinarrizko mantentze-lanak modu autonomoan kudeatzeko gaitasunak garatu ahal izateko ahalduntze espazioak sortzea bilatzen du.
Parte hartu nahi dutenek otsailaren 12a baino lehen izena eman behar dute, berdintasuna@baztan.eus helbidera posta elektronikoa bidaliz edo 613 003 634 telefono zenbakira deituz (whatsapp ere bai). Plazak mugatuak dira eta Baztanen erroldatutako emakumeei lehentasuna emango zaie, izen-emate ordenaren arabera esleituko dira plazak.
Anima zaitez parte hartzera eta ezagutu zure eskuekin lor dezakezun guztia!
Luzapenari esker, 2026an eta 2027an oraindik burutu gabe dauden ekintzak garatzen segituko da. 2028a berriz, kanpo-ebaluazioa egiteko urtea izanen da; urte horretan eginen da planaren ebaluazio orokorra, berdintasunaren egoeraren diagnosia eguneratuko da, eta Baztango Emazteki* eta Gizonen* Berdintasunerako III. Plana prestatzeko oinarriak landuko dira.
Martxoak 8 Emakumeen Nazioarteko Eguna dela eta, Nafarroako Toki eta Lurralde Entitateek ezinbesteko errealitate bat gogorarazi nahi dugu: gaur egun barneratuta ditugun eta gure eguneroko bizitzaren parte diren eskubide eta askatasun asko mugimendu feministaren borrokei eta historian zehar emakumeen antolamendu kolektiboari esker lortu dira.
Martxoaren 8an Emakumearen Eguna dela eta, Sakanako, Baztango, Bortzirietako, Malerrekako, Larraun aldeko, Leitza aldeko eta Ultzama aldeko berdintasun eta euskara zerbitzuek Emakume* izateko 60 modu izeneko irakurketa-gida kaleratu dute.
