MENDEKOTASUNA DUEN FAMILIAKO NORBAIT ZAINTZEN DUZU?
PARTE HARTU!!!
2023ko apirilak 24
Euskararen Plan Estrategikoa lantzeko parte hartze prozesua abiatuko du Baztango Udalak
Baztango Udalak prozesu parte hartzailea abiatuko du, euskara plana diseinatzeko asmoz.
Prozesuak bi mugarri nagusi izanen ditu. Lehen-lehenik, nondik heldu gara? galdera luzatuko die herritarrei, hau da, euskararen egoera zehatza zein den galde eginen die baztandarrei. Horretarako, galdetegi bat prestatu du, eta gaur bertan hasiko da hedatzen.
Galdetegia betetzea erraz-erraza da, eta laburra. Euskararen inguruko galderak dira eta Udalak aunitz eskertuko luke ahalik eta baztandar gehienek erantzutea.
KLIKATU HEMEN GALDETEGIA eskuratzeko eta erantzuteko (10 minutu izanen dira).
Udalak azpimarratu du Baztan bere osotasunean hartuko duela aintzat, eta horren adierazle izanen ditugu ekainean eta irailean kuartelka eginen dituen lan-mahaiak, bilera irekiak, alegia; hartara, herri bakoitzeko errealitatea aditzeko parada izanen du. Horrez gain, alkateak aipatu duenez, gazteengana iristeko helburu irmoa du eta haiei propio zuzendutako saio bat antolatuko du Elizondon.
Iritzi bilketaren ondotik eta diagnosia eskuartean duelarik, nora goaz? zehaztera ekinen dio. Eta hori izanen da, hain zuzen ere, eginbidearen bigarren mugarri nagusia. Beraz, iraila eta urria aitzinera begiratzeko hilak izanen dira. Hots, proposamenak egiteko unea eta gakoak identifikatzeko garaia. Udalak proposamenak egiteko modua errazte aldera, bilera zabalak antolatuko ditu iritziak bertatik bertara aditzeko.
Laburbilduz, euskara plana diseinatzeko xedez, iritziak entzuteko eta proposamenak egiteko espazioak zabalduko ditu Baztango Udalak apiriletik azarora, eta espazio horietan herritarrek eta eragileek parte hartzea eskertuko du.
ERLAZIONATUTAKO BERRIAK
Baztango Udalak Berdintasunerako II. Plana luzatzea adostu du
Luzapenari esker, 2026an eta 2027an oraindik burutu gabe dauden ekintzak garatzen segituko da. 2028a berriz, kanpo-ebaluazioa egiteko urtea izanen da; urte horretan eginen da planaren ebaluazio orokorra, berdintasunaren egoeraren diagnosia eguneratuko da, eta Baztango Emazteki* eta Gizonen* Berdintasunerako III. Plana prestatzeko oinarriak landuko dira.
Martxoak 8 – FEMINISMOARI ESKER… GAUR IZAN, EGON, ESAN ETA ERABAKI DEZAKEGU
Martxoak 8 Emakumeen Nazioarteko Eguna dela eta, Nafarroako Toki eta Lurralde Entitateek ezinbesteko errealitate bat gogorarazi nahi dugu: gaur egun barneratuta ditugun eta gure eguneroko bizitzaren parte diren eskubide eta askatasun asko mugimendu feministaren borrokei eta historian zehar emakumeen antolamendu kolektiboari esker lortu dira.