Ayuntamiento de Baztan

Martxel Larraza eta Joseba Olagarai kazetariek Xerka hitzaldia emanen dute Elizondon, heldu den ortzegunean, 18:30ean, Arizkunenean. Eurekin batera, Xarre Bidegain lekaroztarrak ere bere lekukotza eskainiko du. Solasaldiaren ondoren, hurrengo ortzegun goizera arte, argazki-erakusketa ikusgai egonen da Arizkunenean.

Hitzaldian, zenbait lurralde, jatorri eta adinetako bortz pertsona disidenteren nortasunak eta bizi-esperientziak ezagutaraziko dituzte. Ekimenak, hain zuzen, helburu du mezu positibo bat transmititzea: euskal landa-eremuan posible dela queer izatea eta herrian bizitzea, euskaraz. Izan ere, sexilioa deitzen zaio sexu-orientazioa edo genero-identitatea dela-eta jasandako zapalkuntzarengatik euren gizarte-ingurunetik hiriguneetara ihes egiten duten LGTBIQ+ pertsonen migrazio behartuari.

Xerka Martxel Larrazak 2023an ondutako fotokazetaritza proiektua da, urtebete beranduago komunikazioko GRALen III. BERRIA sariketan saritu zutena. Paisaiaren eta erretratuaren genero klasikoak uztartuz eta hainbat teknika eta estilo fotografiko baliatuz, subjektuaren eta haren ingurunearen arteko dialektika poetikoa proposatzen dute argazkiek, gatazkatsua bezain harmoniatsua izan daitekeen harremanaren inguruan.